اساں سو بدمست قلندر ہئوں
اساں سو بدمست قلندر ہئوں
کݙیں مسجد ہوں کݙیں مندر ہئوں
کݙیں چور بݨوں کݙیں ڄار بݨوں
کݙیں توبہ استغفار بݨوں
کݙیں زہد عبادت کار بݨوں
کݙیں فسق فجوریں اندر ہئوں
کتھاں درد کتھاں درمان بݨوں
کتھاں مصر کتھاں کنعان بݨوں
کتھاں کیچ ، بھنبھور دا شان بݨوں
کتھاں واسی شہر جلندر ہئوں
کتھاں صو معہ ، دیر ، کنشت کتھاں
کتھاں دوزخ ، باغ بہشت کتھاں
کتھاں عاصی ، نیک سرشت کتھاں ؟
کتھاں گمراہ ہئوں کتھاں رہبر ہئوں
ہیوں اوقلاش تیں رند اساں
پئی نوری ہند تیں سندھ اساں
ہیوں بے شک عارف چند اساں
کل راز رموز دے دفتر ہئوں
ہن ناز ، نواز دے ٹول کݙیں
ہے مونجھ منجھاری کول کݙیں
رلے ڈھول کݙیں ، ڳیا رول کݙیں
کݙیں بر در ہئوں کݙیں در بر ہئوں
ول واتوں سمجھ فرید' ، الا
کر محض نہ شعر جدید ولا
ہے چالوں حال پدید بھلا
توݨے کیجو سارے ابتر ہئوں
خواجہ غلام فرید
|