کملی نوں رنگ لا گیا

[canadian]

..

کملی نوں رنگ لا گیا
زُھراؔ بیگم

لَا إلہ دی بین وجا کے
إلا للہ دی رمز سمجھا کے
میر تیر ساری مٹا کے
اپنا ہونا صحیح کرا کے
پَل چ اپنا بنا گیا
کملی نوں رنگ لا گیا

اِلَ اللہ دی ہویٔ گلکاری
بن گیٔ بھیڑی چادر پُھلکاری
مُڑ نہ رہی اے دنیاداری
چھڈنی پیندی اے مکاری
ایہو ای سمجھا گیا
کملی نوں رنگ لا گیا

ضرب اللہ ہُو دی وجدی
جاۓ لُوں لُوں وچ اگ مچدی
نِت کالی بُھوری بدلی گجدی
کویُ گل زُھراؔ ہور نہ جچدی
انوکھے روپ وکھا گیا
کملی نوں رنگ لا گیا

ڈنگ اللہ ہُو، پھنیر سپ ورگا
ڈنگیندیاں لتھا دل والا چرگا
ہو گیٔ انہونی، نہ بہندا کویٔ جرگا
دارو کیہ لبھنا جد پے گیا مرگا
زہری وِس چڑھا گیا
کملی نوں رنگ لا گیا

ہور کسے نوں جےسپ ڈنگے
دارو آون پے ست رنگے
لے جان ماندری دام مُنہ منگے
ساتھوں تاں لوکو اوہو چنگے
بِن دارو مرواگیا
کملی نوں رنگ لا گیا

ویہڑے اللہ ہُو دے وڑ کے
وچ تیل کڑاہی تڑکے
ہن پھڑ، پنچھی پیا پھڑکے
بُوہا دل دا ول ول کھڑکے
کلیجڑے پھٹ پا گیا
کملی نوں رنگ لا گیا

بُوہے کھلوتی عیبن بھاری
سبھناں توں بھیڑی، اصل نکاری
آ سایٔاں، کر کر منتاں ہاری
آ ویکھ، پھٹ لگا اے بھاری
زُھراؔ نفی کرا گیا
کملی نوں رنگ لا گیا