is shehr meN kyaa jaaniYe kyaa Dh`ooND rahaa hooN!
Khud mujh` ko naheeN is kaa pataa! Dh`ooND rahaa hooN!

dil meraa fasurdah hai, tabee,a't miree naalaaN
maiN kash-makash-e-dil kee davaa Dh`ooND rahaa hooN!

uljh`e huYe afkaar haiN, gh`uT,taa huwaa maaHaul
kyaa kahiYe kahaaN fehm-e-rasaa Dh`ooND rahaa hooN!

ujRe huYe gulshan meN gul-o-laalah-o-shabnam
bal kh`aatee huyee baad-e-Sabaa Dh`ooND rahaa hooN!

majbooree-o-laa-chaaree-e-Haalaat se her dam
aazaad ho jo aisee fiZ^aa Dh`ooND rahaa hooN!

har chand keh dunyaa hai jafaa-Khoo-o-jafaa-kaar
maiN Khoo-e-vafaa, naam-e-vafaa Dh`ooND rahaa hooN!

waaqif naheeN koyee bh`ee yahaaN Harf-e-wafaa se
maiN hooN keh wafaa,oN kaa Silaa Dh`ooND rahaa hooN!

jis dil ko Gham-o-dard se furSat naheeN miltee
us dil ke liYe dast-e-Hinaa Dh`ooND rahaa hooN!

Gham-haa-e-muHabbat kee firaavaanee se Dar ke
Gham-haa-e-muHabbat kee davaa Dh`ooND rahaa hooN!

sau but haiN mire dil meN, magar vaah ree himmat!
aSnaam kee dunyaa meN Khudaa Dh`ooND rahaa hooN!

woh shauq-o-wafaa, Zauq-e-junooN, jaZb-e-Khaleelee
aatish ko kare gul jo hawaa, Dh`ooND rahaa hooN!

jo maut ho aSnaam-e-zar-o-seem ke Haq meN
voh Moosawee quwwat, voh a'Saa Dh`ooND rahaa hooN

gar rooH nayee, qalb nayaa Dh`ooND rahaa hooN
kyaa soch rahaa hooN, maiN yeh kyaa Dh`ooND rahaa hooN?

jis dasht meN her shaKhS ho bh`aTkaa huwaa raahee
us dasht meN kyoN raah-numaa Dh`ooND rahaa hooN?

kyoN nashshah-e-Kaucar kee Halaavat ko bh`ulaa kar
GhairoN kee sharaaboN kaa nashaa Dh`ooND rahaa hooN?

sun leejiYe ik a'rZ^ miree Syed-e-Laulaak! (khuda)
bus aap kee hee chashm-e-a't^aa Dh`ooND rahaa hooN!

paanee ko taRaptaa ph`ire jaise koyee pyaasaa
yooN saayah-e-bustaan-e-a'baa Dh`ooND rahaa hooN!

jo zeest har ik aan th`ee Qur,aan kee tafseer
us kaa hee maiN naqsh-e-kaf-e-paa Dh`ooND rahaa hooN!