kahiin ummiid sii hai dil ke nihaaN Khaane men
abhii kuchh vaqt lagegaa ise samajhaane men

mausam-e-gul ho ki patajhaD ho balaa se apnii
ham ki shaamil hain na khilane men na murjhaane men

ham se maKhfii nahiin kuchh rahguzar-e-shauq kaa haal
ham ne ik umr guzaarii hai havaaKhvaane men

hai yuuN hii ghumte rahane kaa mazaa hii kuchh aur
aisii lazzat na pahuNchane men na rah jaane men

naye diivaanon ko dekhen to Khushii hotii ha
ham bhii aise hii the jab aaye the viiraane men

mausamon kaa koii meharam ho to us se puuchho
kitane patajhaD abhii baaqii hain bahaar aane men

jo kuchh kaho qubuul hai taqaraar kyaa karuu.N
sharmindaa ab tumhe.n sar-e-baazaar kyaa karuu.N

maaluum hai ki paar khulaa aasamaan hai
chhuTate nahii.n hai.n ye dar-o-diivaar kyaa kauu.N

is haal me.n bhii saa.Ns liye jaa rahaa huu.N mai.n
jaataa nahii.n hai aas kaa aazaar kyaa karuu.N

hai.n vaa-shigaaf mujh pe tumhaarii inaayate.n
jo ankahii na ho use izahaar kyaa karuu.N

phir ek baar vo ruKh-e-maasuum dekhataa
khulatii nahii.n hai chashm-e-gunahagaar kyaa karuu.N

ye pur-sukuun subah ye mai.n ye fazaa "Shaoor"
vo so rahe hai.n ab unhe.n bedaar kyaa karuu.N

__________________
When the world pushes you to your knees,
you are in the perfect position to pray.

kuchh din to baso merii aa.Nkho.n me.n
phir Khvaab agar ho jaao to kyaa

koii rang to do mere chehare ko
phir zaKhm agar mahakaao to kyaa

ik aaiinaa thaa so TuuT gayaa
ab Khud se agar sharmaao to kyaa

mai.n tanahaa thaa mai.n tanahaa huu.N
tum aao to kyaa na aao to kyaa

jab ham hii na mahake phir saahib
tum baad-e-sabaa kahalaao to kyaa

jab dekhane vaalaa koii nahii.n
bujh jaao to kyaa jal jaao to kyaa

__________________
When the world pushes you to your knees,
you are in the perfect position to pray.

dil se dhaDakan Khuun se azm-e-safar le jaayegaa
vaqt ik din chiin kar saare hunar le jaayegaa

haaN duaa maaNgii thii lekin ye to sochaa bhii na thaa
mausam-e-barasaat sab diivaar-o-dar le jaayegaa

aaj is titalii ko in phuulon pe uDane diijiye
kal koii jhonkaa havaa kaa is ke par le jaayegaa

tuu kisii andhe kuyeN men jaaye to ye jaan le
saath saath apane ye merii bhii nazar le jaayegaa


duusaro.n ke ghar me.n patthar phenkane vaale ye soch
tuu bachaa kar kis tarah shiishe kaa ghar le jaayegaa

shahar kii sa.Dako.n pe mere saath mat niklo abhii
jo bhii dekhegaa uDaa kar ye Khabar le jaayegaa

sar-bulandii jis kaa manasab hai vo jhuk sakataa nahii.n
dast-e-qaatil us kaa Khud neze pe sar le jaayegaa

__________________
When the world pushes you to your knees,
you are in the perfect position to pray.

Aayina dekh ke, aik aur tamasha dekho,
Apne paikar mein mera hussan-e-tamana dekho,

Tum ko khush ayi na shayed meri palkon ki nami,
Dil mein utray ho to aao mera sehraa dekho,
...

Meri peyas’on, meri aaso’n, meri ankhon mein kabhi,
Mere ban, mere gulistaan, mere daryaa dekho,

Naam le ker mera, tum us ko pukaaro to sahi,
Is bhare sheher mein jis shakhs ko tanha dekho,

Main mohabbat ke safar mein nahin bhatkoon ga kabhi,
Apne qadmon se chamakta hua rasta dekho,

Main agar yaad na aaon, to chaman mein ja kar,
Shaakh ke hath se girta hua pataa dekho..

__________________
When the world pushes you to your knees,
you are in the perfect position to pray.

aKhlaaq na bartenge mudaaraa na karenge
ab hm kisii shaKhs kii paravaah na karenge
kuchh log kaii lafz galat bol rahe hain
isalaah magar ham bhii ab isalaah na karenge
kamgoii ke ek vasf-e-himaaqat hai bahar to
kamgoii ko apanaayenge chahakaa na karnge
ab sahal pasa.ndii ko banaayenge vatiiraa
taa der kisii baab men sochaa na karenge
Gussaa bhii hai tahaziib-e-ta'lluq kaa talabagaar
ham chhup hain bahare baiThe hain Gussaa na kare.nge
kal raat bahut guur kiyaa hai so ham ai "Jaun"
tay kar ke uThe hain ke tamannaa na kare.nge

__________________
When the world pushes you to your knees,
you are in the perfect position to pray.

ham to jaise yahaa.N ke the hii nahii.n
dhuup the saayabaa.N ke the hii nahii.n

raaste kaaravaa.N ke saath rahe
marhale kaaravaa.N ke the hii nahii.n

ab hamaaraa makaan kis kaa hai
ham to apane makaa.N ke the hii nahii.n

in ko aa.Ndhi me.n hii bikharanaa thaa
baal-o-par yahaa.N ke the hii nahii.n

us galii ne ye sun ke sabr kiyaa
jaane vaale yahaa.N ke the hii nahii.n

ho terii Khaak-e-aastaa.N pe salaam
ham tere aastaa.N ke the hii nahii.n

__________________
When the world pushes you to your knees,
you are in the perfect position to pray.

har shammaa bujhii raftaa raftaa har Khvaab luTaa dhiire dhiire
shiishaa na sahii patthar bhii na thaa dil TuuT gayaa dhiire dhiire

baraso.n me.n maraasim banate hai.n lamho.n me.n bhalaa kyaa TuuTe.nge
tuu mujh se bichha.Danaa chaahe to diivaar uThaa dhiire dhiire

ehasaas huaa barbaadii kaa jab saare ghar me.n dhuul u.Dii
aa_ii hai hamaare aa.Ngan me.n patajhar kii havaa dhiire dhiire

dil kaise jalaa kis vaqt jalaa ham ko bhii pataa aaKhir me.n chalaa
phailaa hai dhuaa.N chup ke chup ke sulagii hai chitaa dhiire dhiire

vo haath paraaye ho bhii gaye ab duur kaa rishtaa hai 'Qaiser'
aatii hai merii tanhaa_ii me.n Khushbuu-e-hinaa dhiire dhiire

__________________
When the world pushes you to your knees,
you are in the perfect position to pray.

vo bhii kyaa log the aasaan thii raahe.n jin kii
band aa.Nkhe.n kiye ik simt chale jaate the
aql-o-dil Khvaab-o-haqiiqat kii na uljhan na Khalish
muKhtalif jalve nigaaho.n ko na bahalaate the

ishq saadaa bhii thaa beKhud bhii junuu.N_peshaa bhii
husn ko apanii adaao.n pe hijaab aataa thaa
phuul khilate the to phuulo.n me.n nashaa hotaa thaa
raat Dhalatii thii to shiisho.n pe shabaab aataa thaa

chaa.Ndanii kaif_asar ruuh_afzaa hotii thii
abr aataa thaa to bad_mast bhii ho jaate the
din me.n shorish bhii huaa karatii thii hangaame bhii
raat kii god me.n muu.Nh Dhaa.Np ke so jaate the

narm rau vaqt ke dhaare pe safiine the ravaa.N
saahil-o-bahr ke aa_iin na badalate the kabhii
naaKhudaao.n pe bharosaa thaa muqaddar pe yaqii.n
chaadar-e-aab se tuufaan na ubalate the kabhii

ham ke tuufaano.n ke paale bhii sataaye bhii hai.n
barq-o-baaraa.N me.n vo hii shame.n jalaaye.n kaise
ye jo aatish_kadaa duniyaa me.n bha.Dak uTThaa hai
aa.Nsuo.n se use har baar bujhaaye.n kaise

kar diyaa barq-o-buKhaaraat ne mahashar barpaa
apane daftar me.n litaafat ke sivaa kuchh bhii nahii.n
ghir gaye vaqt kii beraham kashaakash me.n magar
paas tahaziib kii daulat ke sivaa kuchh bhii nahii.n

ye andheraa ye talaatum ye havaao.n kaa Kharosh
is me.n taaro.n kii subuk narm ziyaa kyaa karatii
talKhii-e-ziist se ka.Davaa huaa aashiq kaa mizaaj
nigaah-e-yaar kii maasuum adaa kyaa karatii

safar aasaan thaa to manzil bhii ba.Dii raushan thii
aaj kis darjaa pur_asaraar hai.n raahe.n apanii
kitanii parachhaa_iyaa.N aatii hai.n tajallii ban kar
kitane jalvo.n se ulajhatii hai.n nigaahe.n apanii

__________________
When the world pushes you to your knees,
you are in the perfect position to pray.