Ghazal : Jadar se sir ko takaran e laga hun (revised)
غزل
(سید اقبال رضوی شارب )
نئی قدروں پہ اترانے لگا ہوں
اثاثِ کہنہ دفنانے لگا ہوں
جدر سے سر کو ٹکرانے لگا ہوں
محبت کا ثمر پانے لگا ہوں
کہاں کا زہد کیسی پارسائی
گناہوں میں سکوں پانے لگا ہوں
رواداری کہیں گم ہو گئی ہے
میں اپنوں پر ستم ڈھانے لگا ہوں
مرے اسلام میں الحاد جائز
اذاں مندر سے دلوانے لگا ہوں
کچھ اس رفتار سے بگڑا زمانہ
میں" آئندہ" سے گھبرانے لگا ہوں
کوئی منظر نہیں رکھتا کشش اب
ہر اک منظر سے اکتانے لگا ہوں
یہ سچ وچ کیا ہے دیوانے کی بڑ ہے
سو اب جھوٹی قسم کھانے لگا ہوں
اک ایسے موڑ پر چھوڑا ہے اس نے
کہ اب خود پر ترس کھانے لگا ہوں
ہے انساں کون سی پستی میں شارب
اسے آئینہ دکھلا نے لگا ہوں
|