کتنا حسیں ہے شافعِ محشر سا قافیہ
کلام عقیدت
(سید اقبال رضوی شارب)
میرے قلم نے جب چنا حیدر سا قافیہ
خود پیچھے پیچھے آ گیا خیبر سا قافیہ
کتنا حسیں ہے شافعِ محشر سا قافیہ
پھر اسکے بعد ساقیِ کوثر سا قافیہ
جب مل گیا علم تو علی سوئے رن چلے
آیا ادھر سے مرحب و عنتر سا قافیہ
مدّاح ہیں علی کے ہزاروں ہزار ہا
اس وقت لب پہ آ گیا قنبر سا قافیہ
عنواں ہے کربلا تو کمی قافیوں کی کیا
کربو بلا سے آیا بہتّر سا قافیہ
کیا کیا نفیس لفظ ہیں میری زبان میں
اکبر کے ساتھ ہے علی اصغر سا قافیہ
ہجرت کی شب کی نیند کا عالم نہ پوچھئے
حیدر کے ساتھ جچتا ہے بستر سا قافیہ
شارب کرم خدا کا جڑا تیرے نام سے
مدّاحِ اہلِ بیتِ پیمبر سا قافیہ
|