cheharon kii dhuup aaNkhon kii geharaaii le gayaa
aaiinaa saare shahar kii biinaaii le gayaa

Dube huye jahaaz pe kyaa tabsaraa karen
ye haadasaa to soch kii geharaaii le gayaa

haalaaNki bezubaan thaa lekin ajiib thaa
jo shaKhs mujh se chhiin ke goyaaii le gayaa

is vaqt to main ghar se nikalane na paauuN gaa
bas ek kamiiz thii jo meraa bhaaii le gayaa

jhuuTe qasiide likhe gaye us kii shaan mein
jo motiyon se chhiin ke sachchaaii le gayaa

yaadon kii ek bhiirh mere saath chhor kar
kyaa jaane vo kahaaN merii tanhaaii le gayaa

ab asad tumhaare liye kuchh nahiin rahaa
galiyon ke saare sang to saudaaii le gayaa