Khamoshi bol uThe, har nazar paiGaam ho jaaye
Khamoshi bol uThe, har nazar paiGaam ho jaaye
ye sannaaTaa agar had se baDhe, kohraam ho jaaye
sitaare mashaaleN le kar mujhe bhii DhuunDne nikleN
main rastaa bhuul jaauuN, jangaloN meN shaam ho jaaye
maiN vo aadam-gaziidaa huuN jo tanhaii ke sehraa meN
khud apnii chaap sun kar larza-ba-andaam ho jaaye
misaal aisii hai is daur-e-Khirad ke hoshmandoN kii
na ho daaman meN zarra aur sahraa naam ho jaaye
Shakeb apne taarruf ke liye ye baat kaafi hai
ham us se bach ke chalte haiN jo rastaa aam ho jaaye
Shakeb Jalaali
|