wohi meri kam-naseebi wohi teri bay-niazi
meray kaam kuchh na aaya yeh kamal-e-nay nawazi

Mein kahan hoon tu kahan hay? yeh makan ko la-makan hay
yeh jahan mera jahan hay, ya teri karishma sazi

Isi kash-ma-kash mein guzrein meri zindagi ki ratein
kabhi soz-o-saz-e-Roomi, kabhi Pay-ch-o-tab-e-Razi

Wo fareb-khurda shaheen, k pala ho kar-gaso mein
usay kia khabar k kia hay, rah-o-rasm-e-shah-bazi

Na zuban koi ghazal ki, na zuban say ba-khabar mein
koi dil-kusha sada ho, ajmi ho ya k tazi

Nahin faqr-o-saltanat mein koi imtiaz aisa
yeh sipa ki tegh-bazi, wo nigah ki tegh-bazi

Koi kaarwan say toota, koi bad-guman Haram say
K ameer-e-karwaan mein nahin khoo-e-dil-nawazi