Ham jo taareek raahon mein maarey gaye
Tere honton ke phoolon ki chaahat mein ham
Daar ki Khushk tehni pe vaaray gaye
Tere haathon ki shamm’on ki hasrat mein ham
Neem taareek raahon mein maaray gaye
Sulion par hamaarey labon se pare
Tere honton ki laali lapakti rahi
Teri zulfon ki masti barasti rahi
Tere haathon ki chaandni damakti rahi
Jab khuli teri raahon mein shaam-e-sitam
Ham chaley aaye, laaye jahaaN tak qadam
Lab pe harf-e-Ghazal, dil meN qandeel-e-Gham
Apnaa Gham thaa gavaahi tere husn ki
Dekh qaaim rahe us gavaahi per ham
Ham jo taareek raahon mein maarey gaye
Na rasaa’ii agar apni taqdeer thi
Teri ulfat to apni hii tadbeer thi
Kis ko shikvaa hai gar shauq ke silsile
Hijr ki qatl-gaahon se sab jaa mile
Qatl-gaahoN se chun kar hamaare alam (flags)
Aur nikleNge ushshaaq ke qaafile
Jin ki raah-e-talab se hamaare qadam
MuKhtasar kar chale dard ke faasile
Kar chale jin ki Khaatir jahaaNgeer ham
Jaan ganvaa kar teri dilbarii ka bharam
Ham jo taareek raahon mein maarey gaye
__________________
The Me you have always known, the Me that's a stranger still.
|