Jee To Chahta Hai Ke Main Usey Ek Khat Likhoon
Jee To Chahta Hai Ke Main Usey Ek Khat Likhoon,
Magar Likhoon Kya Agar Main Usey Khat Likhoon?
Koi Batao Aaj Likhoon Ya Kal Likhoon
Koi Mulaqaat Likhoon Ya Koi Pal Likhoon
Mere Shikwe Likhoon Ya Uske Ehsaan Likhoon
Khudkushi Likhoon Ya Uske Qurbaan Likhoon
Rangeen Duniya Likhoon Ya Qabirstan Likhoon
Koi Chaal Likhoon Ya Khuda Ka Farmaan Likhoon
Likhoon Kya Agar Main Usey Khat Likhoon..... ?
Wo Waade Likhoon Ya Wo Kasme Likhoon
Wo Milne-Milaane Ki Rasmein Likhoon
Un Aankon Ke Wo Sulghte Tarz Likhon
Ya Is Dil-E-Bimaar Ke Wo Marz Likhoon
Tabassum Ke Wo Sholay-Sharare Likhoon
Ya Shararat Ke Wo Haseen Ishaare Likhoon
Likhoon Kya Agar Main Usey Khat Likhoon..... ?
Na Khatam Hone Wala Ek Intzaar Likhoon
Ya Naa-Kaam Umeedein Ka Ek Bazaar Likhoon
Daag-E-Dil Likhun Ya Gam-E-Judaai Likhoon
Usey Zindagi Likhun Ke Maut Aayi Likhoon
Uski Berukhi Ya Phir Be-Niaazi Likhoon
Ya Phir Khud Ko Sabr-Majaazi Likhoon
Likhoon Kaya Agar Main Usey Khat Likhoon..... ?
Kabhi Huyi Hi Nahi Jo Wo Baat Likhoon
Kati Hi Nahi Jo Sath Uske Wo Raat Likhoon
Uski Judaii Me Jo Guzri Wo Ghariyan Likhoon
Ya Namnaak Palkon Ki Kuch Ladiyaan Likhoon
Ghazal, Nazm, Qata, Sher, Rubaayi Likhoon
Ya Main Phir Usey Khuda Ki Khudaii Likhoon
Likhoon Kya Agar Main Usey Khat Likhoon..... ?
__________________
When you try, you risk failure. When you don’t try, you ensure it.
|