Hayaat maut ka hee ek shaaKh saanah lage
hameN Khud apni Haqeeqat bhi ik fasaana lage


jo dard hai woh tere qurb kee nishaanee hai
jo saaNs hai woh teree yaad ka bahaanah lage

pare hai sarHad-e-idraak se wujood teraa
agar maiN sochooN tujhe mujh` ko ik zamaana lage

yeh meri aarzoo-mandee! ye meri maHroomee!
Khudaa Khudaa to rahe par Khudaa Khudaa na lage

Khudee ne khol diYe raaz-e-beKhudee ham par
qadam qadam peh hameN teraa aastaana lage

woh teri yaad kee Khushboo, umeid kee aahat
samand-e-shauq ko goyaa ke taazyaanah lage