kuchh ajab zindigi ke manzar hain
door tak rait ke samandar hain

meri hi roshni ke paikar hain
chand shaklen jo dil ke andar hain

dil jo Thahre to kuchh suraaGh mile
qarz kis kis nazar ke ham par hain

hai bari cheiz naazuki dil ki
kis se kahiye ki log patthar hain

khul gai aankh to khulaa ham par
Khvaab bedaariyon se behtar hain

Khaamushi Khud hai ek gahraaie
chup hain jo log wo samandar hain

zaKhm par kyaa guzar gaie'Shayar'
rezaa rezaa tamaam nashtar hain