Uske dene main kami hai koi aisa bhi nahi
Maangne ka tujhe aye dost saliqa bhi nahi
Zindagi yun tou mere saath raha karti hai
Lekin aise ke koi dard ka rishta bhi nahi
Ek hulchul si hai kiun kaanch ke aiwanoun main
Abhi patther tou mere haath main aaya bhi nahi
Shaher ka shaher hai dooba hua taarikii main
Kiya kahin jaltey makanoUn ka ujaala bhi nahi
Kiun mehktey hain mere dil ke abhi se rastey
Woh to is samt se ho ker abhi guzra bhi nahi
Thaam ker haath jo manzil pe hamain chodh gaya
Ajnabi koun tha woh hum ne yeh poocha bhi nahi
Ek hum uske taaqub main rahe umr tamaam
Ek woh us ne palat ker kabhi dekha bhi nahi
Muntazir uske jawabaat ki rehti hoon
Zindagi bhar koi naama jise likha bhi nahi
Kho gaye sab mere lafzoun ki sajawat main
Mere afkaar ki teh tak koi pahooncha bhi nahi