دُنیا دے سنگار منگاں
..
دُنیا دے سنگار منگاں
زُھراؔ بیگم
نہ منگاں میں جنتّاں، نہ دُنیا دے سنگار منگاں
منگاں تے سوہنیا تیتھوں تیرا قُرب دیدار منگاں
منہہ زور پانیاں نال کریساں مقابلے
سنگ تیرا لبھن کارن کردی پِھراں ہر معاملے
جِند تلی تے رکھی، سمندریں پار منگاں
تیتھوں تیرا قُرب دیدار منگاں
کیہہ کریساں میں دُدھاں شہداں دیاں نہراں
زہر کر سمجھاواں جنّتی تختاں، حُوراں، لہراں
کجھ نہ منگاں سوہنیا میں ہر دم تیرا پیار منگاں
تیتھوں تیرا قُرب دیدار منگاں
اگ لاواں دنیا نوں، وچے بہشتاں وی ساڑ دیواں
ترے قُرب لیٔی سجناں مین لوں لُوں اپنا وسار دیواں
نہ منگاں کمخواب تے نہ ہیریاں دے ہار منگاں
تیتھوں تیرا قُرب دیدار منگاں
|