revised and extended : شاید اسی لئے نہ تھا سایہ جناب کا
نعت و منقبت
سید اقبال رضوی شارب
(sharibmet@yahoo.com)
انعام مل گیا ہمیں رحمت کے باب کا
نازل ہوا جو نور رسالت مآب کا
مقروض دینِ با ری ہے جسکے شباب کا
نائب تو بس وہی ہے رسالت مآب کا
کافر بھی کہہ رہے ہیں کلامِ بشر نہیں
یہ بھی تو معجزہ ہے خدا کی کتاب کا
ظلمت قریب آ نہیں سکتی حضور کے
شاید اسی لئے نہ تھا سایہ جناب کا
بندوں کے ساتھ انکا خدا بھی شریک ہے
صَلِّ علٰی کا ورد ہے کس آب و تاب کا
چوده صدی کی منفی سیاست کے باوجود
پھیلا ہوا ہے نور رسالت مآب کا
ہر چیز مانگتا ہوں خدا کے حضور سے
سائل ہوں گر چہ میں تو درِ بو تراب کا
خاکِ شفا نے مرحلے آساں بنا دیے
قصّہ یہ مختصر ہے حساب و کتاب کا
دشمن کو اے خدا تو مثالی عذاب دے
گستاخیِ رسول کے ہر ارتکاب کا
یہ بھی علی کا ایک تعارف ہے دوستو
کوثر پہ و ہی دیں گے پیالہ شراب کا
شارب بجز علی کوئی سمجھا نہ ٹھیک سے
قوسین بھر کی دوری و قصّہ حجاب کا
|