Kamra-e-Imtihaan Mein!!

[ravaila]

bay nigah aankhon se daikhte hain parchay ko
bay khayal haathon se
an banay se lafzon par ungliyaan ghumatay hain
ya sawalnamay ko daikhtay hee jatay hain


har taraf kan annkhion se bach bacha ke taktay hain
doosron k parchon ko rahnuma samajhtay hain
shayad is tarah koi raasta hee mil jaye
bay nishaan jawaabon ka kuch pata hee mil jaye


mujh ko daikhtay hain to
yoon jawab kapy par hashiye lagatay hain
dairay banatay hain
jaisay un ko parchay kay sab sawal aatay hain
is tarah kay manzar mein
imtehaan gaahon mein daikhta hee rehta hoon
nakhal karnay walon kay
nit naye tareeqon se
aap lutf laita tha, doston say kehta tha
kis taraf se janay yeh
aaj dil ke aangan mein ik khayal aaya hai
sainkrhon sawalon sa ik sawal laya hai


waqt ki adalat mein
zindagee ki soorat mein
yeh jo teray haathon mein ik sawalnama hai
kis ne yeh banaya hai!
kis liye banaya hai!
kuch samajh mein aaya hai?


zindagii kay parchay ke
sab sawal lazim hain, sab sawal mushkil hain!


bay nigah aankhon se daikhta hoon parchay ko
bay khayal haathon se
anbanay say lafzon par ungliyaan ghumaata hoon
hashiye lagata hoon
dairay banata hoon


ya sawalnamay ko
"DAIKHTA HEE JATA HOON"