Mil Gaye Tum Bhi To ..

[Stunner]

Qurbaton Mein Bhi Judaii K Zamaanay Maangay,
Dil Wo Be-Mehr K Ronay K Bahaanay Maangay.

Hum Na Hotay To Kissi Aur K Charchay Hotay,
Khalqat e Shehar To Kehnay Ko Fasaanay Maangay.

Yehi Dil Tha K Tarasta Tha Maraasim K Liye,
Ab Yehi Tarq e Ta'lluq K Bahaanay Maangay.

Main Woh Mehroom K Jaisay Koi Wairaana Ho,
Tuu Woh Khush-Fehm Kharaabon se Khazaanay Maangay.

Apna Yeh Haal K Jee Haar Chukay Lutt Bhi Chukay,
Aur Mohabbat Wohi Andaaz Puraanay Maangay.

Zindagi, Hum Teray Daaghon Se Rahay Sharminda,
Aur Tuu Hai k Sadaa Aayena-Khaanay Maangay.

Dil Kisi Haal Pe Qaanay Hi Nahin Jaanay Faraz,
Mil Gaye Tum Bhi To Kya Aur Na-Jaanay Maangay .. !!

Ahmad Faraz ..


.