گناہگار ہو یا معتبر ضروری ہے

[bl chughtai]

گناہگار ہو یا معتبر ضروری ہے
ہر اک جبیں کے لئے کوئی د ر ضروری ہے

بجا ہے خواہشِ دستار لیکن اس کے لئے
فرازِ ِدوش پہ خود دار سر ضروری ہے

کھلے ہوں گھر کے دریچے سبھی ضروری نہیں
پر اس میں تازہ ہوا کا گذ ر ضروری ہے

میں جانتا ہوں ہوا سے مقابلے کے لیے
چراغ کون سا کس بام پر ضروری ہے

جو درمیاں کا تعلق بحال رکھنا ہے
تو پھر انا کی فصیلوں میں د ر ضروری ہے

نصابِ عشق نیا ہے مگر میں جانتا ہوں
کہاں پے زیر ، کہاں پر زبر ضروری ہے

گو والدین کا نعم البدل نہیں پھر بھی
گھروں میں کوئی گھنیرا شجر ضروری ہے

سکون دیتی نہیں کوٹھیاں کرایے کی
امینؔ جیسا بھی ہو اپنا گھر ضروری ہے