ہے اب بھی جھوٹ و مکر میں انساں پھنسا ہوا

[alphabravo]

بہ حضور امام مہدی (ع )

(سید اقبال رضوی شارب )

بیتِ حسن تھا نور سے ہر سو بھرا ہوا
نرجس کو جب * محمّدِ آخر عطا ہوا

حبِّ علی سے جام مرا ہے بھرا ہوا
چودہ ملا کے پی تو وہی ذائقہ ہوا

اک منتظَر سے میرا عجب سلسلہ ہوا
رکھا ہے انتظار سے خود کو بندھا ہوا

بغضِ علی کا زہر ہے جس میں بھرا ہوا
ہے چشمِ مصطفیٰ میں وہ انساں گرا ہوا

صدیوں کی ظلمتوں سے بشر کب رہا ہوا
ہے اب بھی جھوٹ و مکر میں انساں پھنسا ہوا

حسن و جمال یوسفِ کنعاں پہ تھا کمال
مہدی کو حسن ان سے سوا ہی عطا ہوا

قد بھی میانہ عمر بھی اور رنگ گندمی
چہرے پہ تل ہے جیسے ستارہ ٹَکا ہوا

سینہ کشادہ کاندھے کھلے دانت خوب رو
اور پشت پر نشانِ امامت بنا ہوا

ہادی نبی رسول سبھی آ چکے مگر
طاغوت ہی ہے کتنوں کا رہبر بنا ہوا

غاصب ہماری نظروں کو بھایا نہیں کبھی
کچھ لوگوں کی ہے آنکھوں کا تارا بنا ہوا

گر منتظر ہو دل سے تو آئیں گے وہ ضرور
"رہنے دو انتظار کے در کو کھلا ہوا "

حُر کی ذرا یقین کی منزل تو دیکھئے
شفقت پہ شہ کی کتنا تھا تکیہ کیا ہوا

محفل " طرح " کی اب کے تو قائم نہ ہو سکی
شارب نے یہ کلام ہے پھر بھی کہا ہوا

*[ His name is Mohammad and kunniyat also Abul Qasim . Reference Hadith : Awwalona Muhammad wa awsatona Muhammad wa Akhirona Muhaammad wa Kullona Muhammad]