Aap bevajah pareshaan si kyun hain maadaam
log kahate hain to phir theek hi kahate hon ge

mere ehabaab ne tahaziib na sikhi hogi
mere maahaul main insaan na rahate hon ge

nuur-e-saramaayaa se hai ruu-e-tamaddun ki jilaa
ham jahan hain vahan tehzeeb nahin pal sakti

muflisi hiss-e-lataafat ko mitaa detii hai
bhuuk aadaab ke saa.Nche main nahin dhul sakti

log kahate hain to logon pe t’ajjub kaisa
sach to kahate hain ki naadaaron ki izzat kaisi

log kehte hain magar aap abhi tak chup hain
aap bhi kahiye gharibon main sharaafat kaisi

nek maadaam! Bahut jald vo daur aayegaa
jab hamain zeest ke advaar parakhne hon ge

apani zillat ki qasam, aap ki azmat ki qasam
ham ko taazeem ke ma'yaar parakhne hon ge

ham ne har daur main tazleel sahi hai lekin
ham ne har daur ke chehare ko ziyaa baKhshi hai

ham ne har daur main mehnat ke sitam jhele hain
ham ne har daur ke haathon ko hina baKhshi hai

lekin in talKh mubaahis se bhala kya haasil
log kahate hain to phir theek hii kahate hon ge

mere ehabaab ne tahaziib na sikhi hogi
mere maahaul main insaan na rahate hon ge