بہت شکریہ جاوید صاحب کہ آپ نے اس بحث میں مجھے گردانا۔ اس ضمن میں یہ عرض کرتی چلوں کہ اپنے طور پر مَیں ایک پراجیکٹ پر کام کر رہی ہوں ، جس میں اردو زبان اور ادب پر کام ہورہا ہے۔ میں نے ایک بلاگ بھی لکھنا آغاز کیا تھا لیکن وقت کی قلت کے باعث مَیں اس پر کوئی خاطر خواہ کام نہیں کرسکتی۔ موخرالذکر پراجیکٹ کی بابت، میں ذاتی طور پر بہت سی ایسی شخصیات سے ملی جنھوں نے اس کام میں میری کچھ نہ کچھ مدد کرنے کا یقین دلایا ان میں اوریئینٹل کالج اور گورنمنٹ کالج یونیورسٹی لاہور، شعبہ اردو کے کے نگران ، پاکستان ٹیلی وژن نیٹ ورک کی سابقہ مینیجنگ ڈائریکٹر، ایک نجی ٹی وی چینل کے مینجنگ ڈائریکٹر اور مختلف شعبہ ہائے زنگی سے منسلک، بیرون ملک رہنے والے افراد بھی جوکہ اردو ادب پر کام کرنا چاہتے ہیں۔ ان سب کا فرداً فرداً ہمہ وقت مجھ سے رابطہ رہتا ہے۔
سب سے پہلے ہمیں اُن تمام افراد کو ایک پلیٹ فارم پر لانا ہوگا جو اردو کے تحفظ کے لیے کام کرنے کے خواہشمند ہیں۔
یہاں ایک بات وضاحت کرتی چلوں کہ ہمارا مقصد اپنی زبان کا تحفظ اور فروغ ہے ، کسی دوسری زبان کو نشانہ بنانا ہرگز نہیں۔

میں بطور لسانی ماہر ، بسا اوقات یہ محسوس کرتی ہوں کہ لوگوں کی لسانیات سے زیادہ ادب میں دلچسپی ہے یہاں تک کہ نصاب میں پڑھائی جانے والی گرامر ، صرف و نحو رموز و اوقاف سے آج کی نسل کا دور دور تک کوئی واسطہ نہیں۔
میں اُن اساتذہ سے التماس کرنا چاہتی ہوں جو اردو پڑھارہے ہیں کہ وہ طلبا و طالبات کی گرامر اور املا پر ہونے والی جدید تحقیق سے متعلق آگاہ کرتے رہیں۔ بچوں کا املا اس حد تک خراب ہے کہ وہ آج بھی بہت سے متروک الفاظ اپنی زبان اور تحریر میں استعمال کرتے ہیں
کہنے کا مقصد یہ ہرگز نہیں کہ ہمارے اساتذہ قابل نہیں بلکہ میں یہ کہنا چاہتی ہوں کہ زبان و ادب کو بہت مشکل اور خشک بنادیا گیا ہے جس کی ایک وجہ یہ بھی ہے نصاب مرتب کرتے وقت طلبا کی دلچسپیوں اور ضروریات کا خیال نہیں رکھا جاتا۔
ان کے علاوہ بیشتر عناصر ہیں جن کی وجہ سے اردو زبان و ادب میں دلچسپی مفقود ہوکر رہ گئی ہے۔ انشااللہ میں کوشش کروں گی کہ بہت سے باصلاحیت لوگوں کے اس فورم میں شرکت کرتی رہوں۔
اگلی بار اور جلد ہی مَیں کچھ تجاویز لے کر حاضر ہوں گی۔
اللہ ہم سب کا حامی و ناصر ہو